Frabiché: sostëgns nüs en forza
Ai 26 de jügn él jü en forza le “decret svilup” che prevëiga n aumënt dles detrates dales cutes por i laûrs de recuperada dles abitaziuns, sciöche inće n arlungiamënt di terminns por s’anuzé di benefizi dles cutes por i ressanamënć energetics ćina ai 30 de jügn dl 2013.
Detrata dala cuta por i laûrs de recuperada
Les spëises por i laûrs de recuperada di frabicać, fać dai 26 de jügn dl 2012 ai 30 de jügn dl 2013, po gnì detrates dala cuta sön le davagn te na mosöra dl 50% (ćina śëgn ê le limit dl 36%). Implü é le cost mascimal gnü alzè da 48.000 euro a 96.000 euro.
Detrata dala cuta por ressanamënć energetics
La detrata dala cuta por i ressanamënć energetics romagn anfat (55%) ćina ai 31/12/2012. Dal 01/01/2013 ćina ai 30/06/2013 vëgn la soma da trà jö dala cuta arbassada al 50%.
De plü informaziuns ciafëise chilò: www.centroconsumatori.it.
Assiguraziuns sön la vita liades ai imprësć
ZCS: metede averda ales regoles nöies en forza dal 1. de lugio
Dal 1. de lugio inant él en forza le Regolamënt ISVAP (n. 40 di 3 de mà dl 2012), aladô dla lege sön les liberalisaziuns (lege n.27/2012), che fej fora i contignüs minimai dles assiguraziuns sön la vita coliades al’erogaziun de n imprëst o de n credit.
Sce l’erogaziun dl finanziamënt é lié a n’assiguraziun sön la vita, mëss la banca ti sotmëte al tliënt altamo dui preventifs de dui grups assiguratifs desfarënć, por ti dè al tliënt la poscibilité da se chirì fora instës l’assiguraziun sön la vita che é miù marćé (te 10 sis de laûr da canche al é gnü dé jö i preventifs).
L’assiguraziun chirida fora mëss gnì azetada dala banca, sce ara ademplësc les condiziuns minimales fates fora, y la lîta dl’assiguraziun ne po nia influenzè la spana di fić dl imprëst conzedü. Por alisiré le confrunt di preventifs él gnü laurè fora n fac simile standardisé.
De plü informaziuns: www.centroconsumatori.it/assicurazione
Assiguraziun de responsabilité zivila dl auto: curides plü altes
Da jügn inant mëss l’assiguraziun ester altamo de 5 miliuns de euro
Al plü tert ai 12 de jügn dl 2012 (ultima data) é i mascimai gnüs alzà dl dopl te düć i contrać d’assiguraziun de responsabilité zivila dl auto che ê bele gnüs stlüć jö ô che é gnüs stlüć jö. Denant ê le mascimal fissé dala lege de 2,5 miliuns de euro por i dagns ales porsones y de 500.000 euro por i dagns materiai.
Da śëgn inant é i imporć minimai preodüs dala lege de 5 miliuns de euro por i dagns ala porsona, y de 1 miliun de euro por i dagns materiai. L’aumënt é preodü da na diretiva europeica.
L'aumënt ne podess nia influenzè les premies; mo al pîta na majera sconanza a che che à albü dagns te n bur inzidënt.
Metede averda sce I ëis apostè cun l’agenzia de iadi Mundolengua – la cooperativa é gnüda desliada y i iadi ne vëgn nia garantis!
La Zentrala di Consumadus (ZCE) n’à nia ćiamò coiü adöm dötes les informaziuns, mo al é sigü che l’agenzia de iadi Mundolengua da Maran é gnüda desliada y che ara ne po nia jì inant cun süa ativité. Por che che à prenotè na sojornanza pro chësta agenzia él sambëgn na gran delujiun: les vacanzes ne vëgn nia garantides!
L’agenzia de iadi Mundolengua da Maran se cruziâ dantadöt de vacanzes y sojornanzes por imparè lingac foresć. La Provinzia Autonoma de Balsan à deslié d’ofize chësta cooperativa y ne ti à nia conzedü da jì inant cun süa ativité. Por i tliënć de chësta agenzia – dantadöt jogn y studënć – él sambëgn ri ajache al ô dì che la vacanza – prenotada y paiada – ne vëgn nia garantida. I consumadus po s’anuzé dl sorvisc d’assistënza debann dla ZCE: i podëis ortié na e-mail a chësta misciun info@euroconsumatori.org o cherdè sö al numer 0471/980939 dal lönesc al vëndres dales 8 ales 16 y vigni secunda y cuarta sabeda dl mëis dales 9 ales 12.
Cuta de bol di cunć corënć: co fà da la tignì fora
N decret dl Ministêr dl’Economia y dles Finanzes (decret 24/05/2012, publiché tla GO di 01/06/2012) porta n pü’ de tlerëza sön l’argomënt “cuta de bol”.
Por ći che reverda i estrać di cunć corënć y i libri de sparagn (bancars o postai) é la cuta dal 1. de jenà dl 2012 inant de 34,20 euro sce le tliënt é na porsona fisica, y de 100 euro sce le tliënt é na porsona iuridica.
Le decret confermëia che la cuta de bol ne vëgn nia aplicada ales deponüdes “minimales”, chël ô dì a chëres che ne superëia nia na deponüda mesana de 5000 euro y é a inom de na porsona fisica.
Metede averda: sce I ëis de plü cunć o de plü libri pro la medema banca cun de manco co 5000 euro, mo la soma totala é de passa 5000 euro messëise paié la cuta por vigni cunt y vigni liber.
Por ći che reverda indere la deponüda y le tëmp de referimënt por la calcolaziun dla cuta dij le decret che “sce i estrać dl cunt vëgn invià periodicamënter ia por l’ann o sce le cunt vëgn stlüt o daurì ia por l’ann, vëgn la cuta raportada al tëmp dl cunt”. Ergo: por stabilì sce la cuta é da apliché o manco por ej. tl pröm (o te n) trimester dl ann, él da consciderè le “valur mesan de deponüda” dl tëmp de referimënt (te chësc caje le trimester).
Cumprè n ćian o n iat
Metede averda, inće sön internet!
La trapolada da dan da püch (di pici ćians, che n’ê gnanca, dê gnì venüs tres transaziun online) porta indô l’atenziun sön le tema dla cumpra de tiers, sides por ći che reverda la sconanza de che che cumpra, che por la sconanza dla sanité di tiers che vëgn venüs.
An ne dess nia cumprè tiers jogn te internet, sön fieres o marćià: les maraties che an se taca se sleria fora plü saurì te de te’ocajiuns. Sce I orëis a vigni moda cumprè n tier jonn te na botëga messëise ghiré che al Ves vegnes dè i dać de proveniënza dl tier y verifiché l’esistënza dl post (oramai feter düć i zidladus à na homepage). Le tier jonn mëss avëi n liber dles vazinaziuns olache al é scrit sö la data de nasciüda, i tratamënć cuntra parassić y les vazinaziuns bele fates da n dotur di tiers. No cumprede tiers jonn che é gnüs arlontanà dala uma denant che ai ess altamo 8 edemes, o avede paziënza denant co le portè a ćiasa. Chësc tëmp costituësc le tëmp minimal che va debojëgn por n svilup psichich ecuilibré dl tier.
De plü informaziuns: www.centroconsumatori.it.
Italia-Programmi / Estesa Ltd.
Avocat de passa cënt agn ortia dala fossa ghiranzes de paiamënt
Ala Zentrala di Consumadus Europeica (ZCE) Talia – ofize de Balsan él rové adalerch ti ultimi dis tröpes domandes de aiüt da pert de consumadus che ciafa tres indô ghiranzes de paiamënt da pert de Estesa Ltd., titolar dl sit internet italia-programmi y da n studio de avocać de Roma conesciü.
La ZCE s’à atira dè da fà y à fat n valgönes inrescides: al é gnü fora che l’avocat inćiarié da italia-programmi é n avocat de passa cënt agn – al é nasciü dl 1906 – y che al é mort da passa 20 agn. Le legal mort dess trà ite la secunda rata dl contrat d’abonamënt che le consumadù dess avëi stlüt jö. Te chësta ghiranza de paiamënt, ortiada por e-mail – dala fossa – inviëia l'avocat i consumadus da paié la secunda rata y sües spëises y so onorar.
La ZCE ti aconsiëia a düć chi che ciafa por posta o por e-mail ghiranzes de paiamënt da pert de italia-porgrammi.org o da pert dl avocat mort, da ne paié nia! L'esperiënza à desmostrè che inće sce la soma vëgn paiada, vëgn les ghiranzes menades inant cun la speranza che chësta "strategia dl terur" portes früć nüs.
Por de plü informaziuns é la ZCE de Balsan a desposiziun di consumadus dal lönesc al vëndres dales 8 ales 16 al numer 0471/980939 o tres e-mail a info@euroconsumatori.org.
Al costa demanco da telefonè da foradecà tl'UE
Al 1. de lugio él jü en forza les tarifes de roaming nöies
Al é de bones noeles por chi che fej süa vacanza te n ater stat dl'UE: dal 1. de lugio él en forza les tarifes de roaming nöies. Śëgn cóstel demanco da telefonè a ćiasa, ortié sms y jì te internet al èster.
Chisc é i cosć mascimai nüs:
- telefonè al éster tl'UE: max. 0,27 euro plü CVA al menüt
- ciafè na telefonada: max. 0,08 euro plü CVA
- ortié n sms: max. 9 zentejimi plü CVA
- ciafè n sms: debann
- roaming trafich de dać: max. 70 zentejimi (plü CVA) al megabyte (MB).
Chisc limić é limić mascimai y vigni operadù po pité tarifes plü basses.
Metede averda: Recordesse che i limić mascimai ne vel nia defora dal’UE, sciöche por ej. tla Svizera, tla Croazia o tla Turchia.
