Assiguraziuns sön la vita„dormiëntes“: terminns por la retüda indô davertes
I consumadus y les consumadësses po ti ortié dai 13 de jügn ćina ai 13 de setëmber dl 2013 ala CONSAP les domandes de retüda dles assiguraziuns sön la vita che ademplësc chëstes condiziuns:
- 1. l’evënt che à sciöche conseguënza le dërt de licuidaziun dl’assiguraziun (mort dla porsona assigurada o tomanza dl’assiguraziun) é sozedü do le pröm de jenà dl 2006;
- 2. la prescriziun é stada dan i 31 de dezëmber dl 2009;
- 3. la sozieté d’assiguraziun à refodè da paié fora l’assiguraziun porvia de chësta prescriziun y à trasferì i scioldi sön le fonds por i “raporć contratuai dormiënć“.
Les sozietês d’assiguraziun mëss contatè ćina ai 30 de jügn les porsones atocades tres lëtra racomanada cun zetola de retüda. Te chëstes comunicaziuns él les indicaziuns por fà domanda de retüda y le formular aposta. Al mëss inće gnì lascè alsavëi che an mëss damanè les sozietês d’assiguraziun do na confermaziun sön le trasferimënt efetif dles somes sön le fonds. Les sozietês mëss dè fora le plü debota che ara va chësta confermaziun.
La plaia di moscheruns– insciö se stravardëise
Cuntra moscheruns öga sprays, gels o loziuns cun sostanzes dai prinzips atifs diethyltoluamid o icaridin. I öri eterics ne joa indere nia. Che che à alergies dess mëte averda.
Implü él gnü proè fora chisc mesi:
- i aparać eletrics cuntra i moscheruns lascia fora insetizig che danejëia i edli y les mucoses;
- i aparać da ultrasonns, che messess parè demez i moscheruns, n’à albü degöna faziun dai tesć;
- les tenores a löm UV copa i inseć tres eletroshock, mo tira adalerch de plü i inseć d’öga co i moscheruns;
- che l’assunziun de preparać da vitamina B1 ais faziun cuntra i moscheruns é na liënda; y inće mangé ai o bëre alcol ne dëida nia;
- les “apps cuntra i moscheruns” messess tignì dalunć i moscheruns tres sonns a frecuënza alta, mo inće chisc tesć ne ti à pa nia fat plü co n tan impresciun ai moscheruns.
Relevadus de gas: istalaziun nia obliënta!
Ti ultimi dis ti röiel adalerch tres de plü segnalaziuns ala ZC sön n’aziënda che vënn relevadus de gas da ćiasa a ćiasa. I oréssun ves recordè che aladô dla lege ne messëise nia istalè chësc aparat – vignun po fà sciöche al ô! Y ajache ara nen va de vëne da ćiasa a ćiasa po le consumadù se trà zoruch (dërt de s’la punsè sura) dal contrat stlüt jö te 10 dis de laûr dala sotescriziun, tres lëtra racomanada cun zetola de retüda (art. 64 dl Codesc dl Consum). L’aparat mëss te chësc caje gnì retü tla sënta dla dita y les spëises mëss gnì paiades dal consumadù instës.
Cracks finanziars y pordüdes pro i investimënć
Do le suzès dla plüra davagnada da n consumadù cuntra na banca locala por pordüdes pro investimënć Lehman Brothers, lascia la ZC alsavëi che al é n sorvisc de valutaziun nü y de pröma consulënza legala sön les pordüdes da investimënć finanziars. Pian ia da messè y i proscimi mëisc sarà le prof. av. Massimo Cerniglia, legal dla assoziaziun nazionala por i consumadus “Federconsumatori” a desposiziun di sozi dla ZC n iade al mëis por valuté adöm i caji de retlamaziun y les poscibilitês d’aziun legala en relaziun a pordüdes da investimënć finanziars.
Prenotaziuns: tel. 0471 975597 (lö-jö 9-12 + 14-17 / vëndres 9-12) o info@verbraucherzentrale.it.
Strom de nöt: liënda dl sparagn rovada
ZCS: chëstes tarifes dl strom de nöt po a pora nia gnì tutes jö
Ara ê gnüda ponsada sciöche n pröm vare devers na fornidöra de strom inteligënt, mo al vëgn tres n majer “bluff”. L’idea foss stada bona: les tarifes müda aladô dl’ora de consum por sostignì le sparagn energetich y n miù control dl consum energetich. L’idea de basa é scëmpla: da sëra y ti fins dl’edema consüma les families y les impreses demanco co ia por le dé y ia por l’edema. Por podëi otimisé le sfrutamënt dles zentrales eletriches, a na moda che so sorvisc sides miù marćé, vënn i produturs de energia le strom a prisc plü basc ti tëmps de “mëndra ćiaria”, chël ô dì de nöt. Chisc prisc ess messü gnì dà inant ai tliënć finai, mo insciö ne n’éra nia stada.
Sce i tolun l’ejëmpl de n tliënt de Balsan cun n consum al ann de 2700 kWh (potënza 3 kW), che sposta so consum de nöt y di santus dal 66% al 80% (la cossa ne n’è pa nia tan scëmpla!), spo sparàgnel 3,99 euro al ann. Che che é bun da sparagné le 90% di consums, sparagna indere 6,96 euro, cun na spëisa al ann (cun laprò les cutes) de 504,32 euro, impede 511,28 euro. Chëstes somes ne sostëgn dessigü nia l’adoranza de mascinns da lavè guant o da lavè jö de nöt o tartan le fin dl’edema.
ZCS: pro les cures dl dotur dai dënz désson dagnora damanè do na secunda minunga
Stravardesse dales trapolades
Tres de plü consumadus che va dal dotur di dënz damana do na secunda minunga denanco fà n tratamënt y/o n intervënt: chësc por garantì dantadöt la cura plü adatada dal punt de odüda terapeutich. Mo sambëgn à inće le cost n rode important, y datrai sozédel che l’oferta alternativa sides plü bun marćé.
Por garantì la mascima liberté de lîta y ne se lié nia massa adora ala pröma oferta fata aconsiëia la ZC da ne sotescrì mai nia atira, mo da lì avisa döt le test – dantadöt les frases ajuntades jöinsom la plata al preventif o les tlausoles stampades a pice. O ćiamò damì: ponsede sura altamo na nöt, liede ćiamò n iade le documënt che s’é gnü dè dal mede y, sce i dubitëis, gnide a damanè do pro le sorvisc de consulënza dla ZC.
N consëi: Ara va dagnora da se trà zoruch da n contrat cun n dotur di dënz, sambëgn sce an paia i cosć che é gnüs a s’al dè ćina chël momënt.
65% de detrata dales cutes por laûrs de ressanamënt energetics!
La detrata dales cutes por laûrs de ressanamënt energetics é gnüda sbörlada ćina ai 31 de dezëmber dl 2013 y alzada dal 55% al 65%. L’aumënt vëgn apliché pian ia dai 6 de jügn dl 2013. Implü ne n’él nia plü conzedü, pian ia da chësta data, la detrata dales cutes por implanć geotermics y pumpes de ćialt. Por chësta sort de intervënć él preodü sostëgns tl “cunt termich”.
Inće la detraziun dales cutes por i laûrs de ressanamënt y la manutenziun, dl 50% dl cost di laûrs fać, é gnüda sbürlada ćina ala fin dl 2013. Implü vara inće da detrà i cosć por i mobii, tl cheder de n intervënt de ressanamënt. Al podarà gnì detrat le 50% dl cost mascimal de 10.000 euro, chël ô dì che la detraziun é de alplü 5.000 euro.
De plü informaziuns é da ciafè chilò: www.verbraucherzentrale.it/bauen.
Trapolada online Auto-Prezzo.net
Metede averda: i consumadus dess lascè ester lëtres d’amoniziun dala Estonia
De merz de chësc ann s’à n valgügn consumadus, che â chirì te internet n meso debann por la valutaziun de so auto de secunda man y che ê rovà sön na plata che ghirâ 59,50 euro por le sorvisc, adressè ala Zentrala di Consumadus Europeica (ZCE) da Balsan. Śëgn ciafi lëtres d’amoniziun da n studio de n avocat tl’Estonia. Por se parè da na plüra désson paié 259,50 euro, insciö stal scrit tla lëtra.
La Zentrala di Consumadus Europeica ti aconsiëia a düć i consumadus da ne tignì nia cunt dles manaciades dl „studio dl avocat“ y da ne reagì nia. Chësc caje mostra che la EU ne n’é nia ma por n marćé unitar por marćianzia y sorvisc, mo che inće les trapolades ne conësc degügn confins.
De plü informaziuns é da ciafè chilò: www.euroconsumatori.org.
Tarifes dl scoaćiamin plü altes
Les tarifes dl scoaćiamin vëgn adatades vigni trëi agn. I prisc é gnüs alzà mesanamënter dl 9% en confrunt al 2009, ater co por ći che reverda le control di föms de desćiaria. Le prisc é gnü adatè al’adoranza reala (n’atra prozedöra da mosoré) y é de 38,97 euro (cun laprò le 10% IVA) por combustibli da gas y fluig. I combustibli solig (lëgn, pellets y i.i.) costa 48,85 euro. Implü pon śëgn mudé scoaćiamin canche an ô. Ćina al dedaincö ê les prestaziuns di sorvisc dl scoaćiamin dagnora sotmetüdes a n'IVA dl 21%. L'Agenzia dles Entrades à tut la dezijiun (cun la ressoluziun 15E) da apliché l'Iva dl 10% por les prestaziuns che reverda la revijiun periodica obliënta, le control dles emisciuns, sciöche inće i laûrs de netijia di implanć de scialdamënt (intervënć de manutenziun ordinara). Chësc vel ma por frabiches che an adora dantadöt sciöche abitaziun. Cosć implü po gnì ajuntà por arjigné n azès temporann y sigü al ćiamin.
Lims nüs por le fonin tl’EU
Dal 1. de messè dl 2013 vêlel chisc prîsc masciami (plü l’IVA dl 21%):
Dać/jì te internet: 0,45 € a megabyte (MB) (cumpedè a kilobyte)
Cherdè sö: 0,24 €/minut
Respogne: 0,07 €/minut
Menè n sms: 0,08 €
