Newsletter
Wenn Sie im KonsumentInnenschutz auf dem Laufenden sein wollen, abonnieren Sie kostenlos das Verbrauchertelegramm als Newsletter.
La ZCS presentëia le portal nü "Verbraucherexperte.info" o "Espertoconsumatori.info"
N portal online por les consumadësses y i consumadus
cun domandes y respostes sön chestiuns de atualité
La ZCS presentëia le portal nü "Verbraucherexperte.info" o "Espertoconsumatori.info". Ara se trata de n portal online nü cun informaziuns ajornades, respostes a domandes che vëgn fates gonot y soluziuns poscibles de problems standard. Insciö se fej les consumadësses y i consumadus ciamó plü saurí da ti rové pormez ales informaziuns plü importantes, deache i tëmps danter sües domandes y les respostes dles consulëntes y di consulënc vëgn zënzater ascortá.
Baldi sozedel datrai tla vita da vigni de che i gnun confrontá cun situaziuns olache nia döt n'é jü dl dër vers, sciöche por ejëmpl bolëtes cun imporc dër alc che an ne sá nia co se splighé o defec de costruziun pro l'abitaziun che an á cumpré. Al n'é indere nia dagnora saurí da conësce avisa i dërc che an á y dantadöt nia da savëi sciöche an pó en caje i fá avarëi. Chiló pól ince gní d'öga les lëtres model che ti vëgn metüdes a desposiziun ales consumadësses y ai consumadus sön le portal.
Sön le portal online nü vëgnel splighé i vari che an podess fá por regolé na chestiun zënza messëi se tigní a orars de daurida o fá telefonades che n'á degöna fin deache al pó gní consulté te vigni momënt.
Le portal online nü "Verbraucherexperte.info" é pert dl proiet "Le consum sostignibl cun n clich su" finanzié dal Ministere dles Impreses y dl Made in Italy (MIMIT) aladô dl art. 5 dl D.M. di 06.05.2022.
L'Antitrust ti fej na sanziun de 2 miliuns de euro a Star Italia Spa
Tëmps de aspeta che ne se röia nia por renové bagns
canche al vëgn dé fora mesanamënter somes de 5.000 euro
La ZCS á arjunt tres l'Autorité garanta por la concorënza y le marcé (AGCM) na sanziun cuntra "Star Italia Spa". La Star Italia Spa é gnüda condanada dal'Autorité garanta por la concorënza y le marcé (AGCM) da paié na straufunga de scioldi de 1,5 miliuns de euro por pratiches comerziales nia coretes y agressives, y ince da paié ciamó na secunda straufunga de 500.000 euro por clausoles adorades malamënter.
Star Italia Spa se dá jö cun la restrotoraziun de bagns y la venüda de cabines dla duscia y vasches da bagn te döta la Talia. Pro süa clientela potenziala röia l'aziënda tres campagnes de publizité ti social media o tla televijiun, y ince tres na rëi de agënc y agëntes sön döt le teritore nazional che baia sö la jënt sön porta de ciasa da stlüje jö contrac da n import mesan de 5.000 euro.
Ti ultimi cin' agn s'á adressé cotan de consumadësses y consumadus ala ZCS. Les reclamaziuns â da nen fá cun laurs de restrotoraziun bele paiá mo che n'ê en pert, do da passa n ann dala sotescriziun dl contrat y dal paiamënt de döt l'import, ciamó mai gnüs fac. La ZCS ne ti á nia ma dé consëis ales consumadësses y ai consumadus mo á ince denunzié chëstes pratiches comerziales nia coretes pro la AGCM.
Por mirit dla plüra dl'Autorité de control y dles amoniziuns che ti é gnüdes menades al'aziënda dala ZCS ti á Star Italia retü i imporc paiá ales consumadësses y ai consumadus (tla mesaria apresciapüch 5.000 euro a familia).
Co se stravardé da arobades tratan la sajun plü scöra
Canche al scomëncia da gní plü adora scür s'alzel ince le prigo da arobades cun scascinada dles abitaziuns. La ZCS ves dá consëis pratics sön coche i podëis fá da stravardé efetivamënter osta abitaziun:
- stlü dagnora portes y finestres: la maiú pert di leri röia te ciasa da portes nia sarades indortöra o da finestres meses davertes. Porchël vëgnel aconsié da stlüje dagnora sciöche al alda les finestres, les portes de sorá y de ciasa - ince sce an s'un vá ma n te pice momënt fora de ciasa y dantadöt de nöt.
- Schivé da ascogne la tle de ciasa invalgó defora: i posć defora plü conesciüs por ascogne la tle de ciasa, sciöche por ejëmpl te n boché dai ciüfs o sot le terjapisc, n'é nia davëi posć sigüsc.
- Mëte en segurëza les entrades secondares: la porta de garasc y les finestres de cianoa vëgn gonot adorades dai leri por rové te ciasa, deache sovënz éres plü ascognüdes y ai pó lauré en pesc. Porchël dessel ince chiló valëi les medemes precauziuns sciöche pro la porta de ciasa y pro les finestres en general.
- Ne sté mai a publiché che an é demez: les foto che an é en vacanza publicades söi social media o d'atres indicaziuns che podess fá capí che an n'é nia a ciasa é por i leri n bel invit. Al vëgn aconsié da dé l'impresciun che zacai sides te ciasa, por ejëmpl cun despositifs automatics che an pó programé o tecnologies smart modernes che impëia por ejëmpl la löm canche al n'é degügn a ciasa.
Ci ó pa dí "bean to bar" pro la ciuchelada?
Dala fau ala tofla - insciö pón traslaté l'espresciun ingleja "bean to bar": le produtur de ciuchelada surantol personalmënter dötes les fases dla lauraziun, dales faus de cacao fermentades y seciades cina ala tofla de ciuchelada rovada.
La filosofia “bean-to-bar” é gnüda sö sciöche movimënt cuntra la produziun de ciuchelada industriala. Dales mius faus de cacao cernüdes fora cun cura da fornidus da regiuns geografiches spezifiches dessel gní fat ciuchelada dla miú cualité cun metodes artejanales o almanco en pert, tl respet di aspec soziai y ecologics. Por i produzënc él porchël important da lauré ala medema altëza cun i fornidus de faus de cacao (paurs y de pices cooperatives), da garantí a düc i liví prisc iüsć y n paiamënt onest, da sostigní na coltivaziun plü che ara vá respetosa dl ambiënt y da prodüje - aladô dla sort de cacao y dla regiun de coltivaziun - ciuchelades da na saú unica.
La ciuchelada "bean to bar" (por inglesc ti vëgnel ince dit "craft chocolate") vëgn normalmënter fata a man te de pices aziëndes y te na certa cuantité de produziun.
Dal'atra pert él i produzënc de ciuchelada industriala che scomëncia so prozes de produziun dal livel de produziun dla massa de cacao groia. Al toma porchël demez düc i vari denant sciöche l'apraté, le rumpe, le scuscé y le majené les faus de cacao. Implü vëgn dötes les fases dla produziun fates daldöt automaticamënter. A chësta moda vëgnel fat te püch tëmp y bunmarcé de gran cuantités de ciuchelada dala medema saú.
Consum de eletrizité
Co pón pa smendrí le consum de eletrizité tratan le tëmp d'Advënt y da Nadé?
Tratan le tëmp d'Advënt consüma tröpes families le plü forza eletrica. Nia da se fá demorvëia, deache al vëgn scialdé deplü, al vëgn fat l'iluminaziun da Nadé y arjigné ca biscoti y de vigni sort de bun patüc da mangé. Y döt chësc costa.
Chisc é i consëis dla ZCS por sparagné forza eletrica, zënza messëi veramënter renunzié a valch:
• cöje te furn cun la ventilaziun él generalmënter plü efiziënt co cun la modalité statica, deache les temperatöres é de apresciapüch 20-30 degrá plü basses y al pó gní cöt sön deplü liví. Sce an sá ciamó ince co anuzé le cialt restant y sce an lascia da scialdé sö damperfora le furn vára da sparagné cotan de eletrizité.
Che che ne ó te degun caje renunzié al'iluminaziun da Nadé pó s'anuzé de löms LED che sparagna energia o tó n'iluminaziun che vá cun l'energia de sorëdl. Sce an smendrësc ciamó lapró i tëmps olache al vëgn impié l'iluminaziun vára da sparagné ciamó deplü.
Por ne dé nia fora deplü por scialdé la ciasa dessel gní impié le scialdamënt te na manira mirada. Bele sce an arbassa la temperatöra de un n degrá, vára da sparagné incër le 6% dl'energia. Sce an deura i vidri desson lascé trá l'aria por 1 cina 3 menüc por schivé da spaterlé energia por nia.
Enel se refüsa da rembursé süa clientela - la reclamaziun coletiva scomëncia
Bolëtes dl gas de cater iadi tan:
Enel Energia n'ó nia rembursé süa clientela do che ara ti á mudé
les condiziuns contratuales ilegalmënter zënza la damané sce ara ê a öna
L'aziënda energetica Enel Energia se refüsa da rembursé sües cliëntes y a sü cliënc do che ara ti â mudé unilateralmënter zënza dërc le prisc de sü contrac dl gas. L'Autorité garanta por la concorënza y le marcé (AGCM) â bele d'aurí invié ia na prozedöra de inrescida sön chësc caje. Les assoziaziuns dles consumadësses y di consumadus Adusbef, Assoutenti, Codici, Confconsumatori y la Zentrala di consumadus dl Südtirol ti á presenté tles ultimes edemes a Enel Energia na proposta de apajada formala, n'esortaziun de omisciun y na ligna de propostes por arjunje n'acordanza a bëgn dles consumadësses y di consumadus che á albü n dann.
Chësc caje reverda le fat che al n'é nia gnü comuniché la mudaziun dles condiziuns de contrat; l'aziënda energetica n'á nia informé por tëmp y coretamënter süa clientela che i prisc dla fornidöra de gas foss jüs sö. A chësta moda á danter jügn dl 2023 y aurí dl 2024 milesc de families ciafé foradenia bolëtes dl gas cotan plü altes; te n valgügn caji fajôl fora cinamai cater o cin' iadi le prisc che ares â paié n valgügn mëisc denant.
Deache l’Enel n'á ciamó dé degöna resposta y al n'é nia poscibl da invié ia na tratativa de acordanza por milesc y milesc de families atocades á les assoziaziuns dles consumadësses y di consumadus tut la dezijiun da jí cuntra l'aziënda energetica cun na reclamaziun coletiva por fá a na moda che al ti vëgnes retü ala clintela dl’Enel atocada les somes surafora paiades y che al vëgnes indô restabilí les condiziuns contratuales da denant.
Consëi dles notares y di notars da Balsan: al é gnü presenté le manual nü sön la reforma
dla iurisdiziun volontara
Le manual nü dal titul "Volontaria giurisdizione. Il notaio e le fragilità sociali: una nuova disciplina per i minori e i soggetti incapaci" é gnü realisé dal Consëi nazional dles notares y di notars y dales assoziaziuns dles consumadësses y di consumadus (Adiconsum, Adoc, Adusbef, Altroconsumo, Assoutenti, Casa del Consumatore, Cittadinanzattiva, Confconsumatori, Federconsumatori, Lega Consumatori, Movimento Consumatori, Movimento Difesa del Cittadino, Unione per la difesa dei consumatori, Unione Nazionale Consumatori) é sëgn da ciafé ince por todësch por mirit dl Consëi dles notares y di notars da Balsan che s'á cruzié dla traduziun.
Le manual ilustrëia la prozedöra nöia portada ite dal d.lgs. 149/2022 (art. 21) che prevëiga - por alisiré i tribunai - la poscibilité che porsones de mëndra eté che á debojëgn de proteziun pois s'adressé, por fá certes aziuns aministratives por chëres che al ó ester n vicare/na vicara, nia ma al vicare/ala vicara mo ince al notar/ala notara (la insciödita iurisdiziun volontara).
Cun chësta reforma pó la notara/le notar - sön la basa dles garanzies pitades dala neutralité - relascé autorisaziuns por la stipulaziun de ac publics y documënc autenticá, olache al vëgn dant na porsona de mëndra eté, na porsona daldöt interdita, na porsona inabila o n soget che benefiziëia dla mosöra de proteziun dl'aministraziun de sostëgn (che vá debojëgn por vëne o cumpré n imobil, azeté n'arpejun, tó pert a n at de imprëst y i.i.) y ince autorisaziuns por ac che reverda bëgns d'arpejun.
Chësc manual é da ciafé sön la plata internet dl Consëi nazional dles notares y di notars www.notariato.it y sön la plata internet dl Consëi dles notares y di notars da Balsan www.notai.bz.it.
Medejina y chirurgia estetica -
metede averda coche y olache i chirise fora osta doturia o osc dotur!
Dan da n valgönes edemes éson gnüs alsavëi dl caje de na jona de 22 agn che é baldi morta do che ara se â lascé fá n'operaziun de chirurgia estetica al nes te n ambulatore roman de dui doturs. Tl zënter medich che n'â gnanca na tofla de afisciun defora n'êl, aladô de ci che é gnü scrit dala stampa, degügn documënc clinics o registraziuns sön l'intervënt (fontana: Ansa). La jona â chirí fora chësc ambulatore do che ara â odü n reclam sön n social dër conesciü danter les jones y i jogn.
Canche an chir fora n ambulatore por fá n intervënt de chirurgia medica o estetica él important da ciaré do sce la doturia o le dotur sides bëgn scrita/scrit ite tl Ordin di doturs de referimënt. Implü vëgnel ince aconsié da stlarí ci spezialisaziun che ara/al á, chël ó dí sce ara/al á na spezialisaziun de chirurgia plastica y estetica. Te n secundo momënt él spo important da se fá dé n apuntamënt por na vijita de consulënza por se fá ince n pü' na idea dl ambulatore olache al gnará fat le tratamënt o dla clinica olache al sará l'operaziun.
Implü pón ciaré do sön sic ofiziai sciöche sön le sit dla SICPRE www.sicpre.it, la Sozieté taliana de chirurgia plastica y estetica, sce les informaziuns che an á stimenëia.
Menü sostignibl por Nadé y San Salvester
Vára ince zënza cern?
Canche an baia de n'alimentaziun sostignibla, spo minon normalmënter derzades cun pücia o degöna cern. Implü fossel tres plü gonot bun da cujiné dales festes ince por porsones che ti vá do a n'alimentaziun vegetariana o vegana. Por fortüna él intratan poscibl da chirí fora danter deplü rezetes vegetarianes o veganes por i dis da festa y insciö vára da cujiné n bun menü sostignibl por düc nüsc ghesć.
En gaujiun di dis de festa á la Zentrala di Consumadus dl Südtirol metü adöm na seleziun de rezetes veganes sajonales. Chëstes rezetes vá sambëgn ince bun por les porsones che mangia te na manira vegetara.
Le menü dles festes dla ZCS é da ciafé sön nosta plata web (https://www.consumer.bz.it/de).
